​ඉරානයට එල්ල කිරීමට ගිය මහා ප්‍රහාරය ට්‍රම්ප් අවසන් මොහොතේ නවත්වයි !

 

ඉරානය විසින් සෞදි අරාබියට සහ එක්සත් අරාබි එමීර් රාජ්‍යයේ බරකාහ් න්‍යෂ්ටික බලාගාරයට එල්ල කළ මාරාන්තික ඩ්‍රෝන ප්‍රහාරවලට ප්‍රතිචාර වශයෙන් ඇමරිකාව දියත් කිරීමට නියමිතව තිබූ "ඔපරේෂන් ස්ලෙජ්හැමර්" (Operation Sledgehammer) මෙහෙයුම ජනාධිපති ඩොනල්ඩ් ට්‍රම්ප් විසින් අවසන් තත්පරයේදී තාවකාලිකව අත්හිටුවනු ලැබීය. 

පෙන්ටගන ආරංචි මාර්ග පවසන පරිදි, ඇමරිකානු B-52 බෝම්බ හෙලන යානා ඉරාන ගුවන් සීමාව ආසන්නයටම ළඟා වී තිබියදී මෙම තීරණය ගෙන ඇත්තේ, ඇමරිකානු ප්‍රහාරයක් එල්ල වුවහොත් ඉරානය විසින් තමන්ගේ තෙල් නිධි සහ නගර මිසයිල ප්‍රහාරවලින් විනාශ කරනු ඇතැයි දැඩි බියට පත් ගල්ෆ් කලාපීය මිත්‍ර රටවල් (Gulf allies) කළ හදිසි ආයාචනයක් හේතුවෙනි.

​මේ පිළිබඳව කරුණු දක්වමින් ජනාධිපති ට්‍රම්ප් ප්‍රකාශ කර සිටියේ, "ඔවුන් මගෙන් ඉල්ලා සිටියා රාජ්‍යතාන්ත්‍රික විසඳුමකට තව එක අවස්ථාවක් දෙන්න කියලා, මම ඔවුන්ගේ ඉල්ලීමට ගරු කරලා ප්‍රහාරය තාවකාලිකව නැවැත්වුවා, හැබැයි ඒකෙන් අදහස් වෙන්නේ නැහැ ඉරානය බේරුණා කියලා" යනුවෙනි. 

ඉරානයේ ටෙහෙරාන් පාලනය කියා සිටින්නේ තම මිසයිල බලයට ඇති බිය නිසා ඇමරිකාව ප්‍රහාරය කල් දැමූ බවක් වුවත්, ට්‍රම්ප් ඒ සියල්ල ප්‍රතික්ෂේප කරමින් ඉරානයට සිය කොන්දේසිවලට එකඟ වීමට පැය 48ක අවසාන නිවේදනයක් (Ultimatum) නිකුත් කර තිබේ. 

දැනට පවතින මෙම උණුසුම්කාරී තත්ත්වය හේතුවෙන් ගෝලීය වෙළඳපොළේ තෙල් මිල තාවකාලිකව ස්ථාවර වුවත්, යුද්ධයක පෙරනිමිති නිසා ආයෝජකයින්ගේ දැඩි අවිනිශ්චිතතාවය මත රන් මිල තවදුරටත් සීඝ්‍රයෙන් ඉහළ යමින් පවතී.