බුද්ධ ශාසනයට අභියෝග එල්ලවන මේ මොහොතේ නිවටයන් වෙනවාද? ශක්තිමත්ව මුහුණ දෙනවාද? තීරණය ජනතාවගේ අතේ - විපක්ෂ නායක සජිත් ප්‍රේමදාස මහතා

 

වර්තමාන සමාජය තුළ සම්බුද්ධ ශාසනයට සහ ආගම දහමට විවිධ පැතිවලින් බාධා සහ අභියෝග මතු වෙමින් පවතින බව විපක්ෂ නායක සජිත් ප්‍රේමදාස මහතා ප්‍රකාශ කරයි. 

ආණ්ඩුක්‍රම ව්‍යවස්ථාව මඟින් සම්බුද්ධ ශාසනයට උත්තරීතර ස්ථානයක් හිමිකර දී තිබුණ ද, එය හුදෙක් ලේඛනවලට පමණක් සීමා නොකර මහපොළොවේ සැබෑ යථාර්ථයක් බවට පත් කිරීම සමස්ත සමාජයේම වගකීමක් බව ඔහු පෙන්වා දෙයි. 

මෙම අභියෝග හමුවේ බෞද්ධයන් ලෙස නිවට වී නිහඬව බලා සිටිනවාද, නැතහොත් ශක්තිමත්ව ශාසනයේ ආරක්ෂාව වෙනුවෙන් කැපවෙනවාද යන්න තීරණය කිරීම ජනතාව සතු කාර්යයක් බව ද ඔහු අවධාරණය කළේය.

විපක්ෂ නායකවරයා මේ බව කියා සිටියේ කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේදී (BMICH) පැවැති සුවිශේෂී උපහාර උත්සවයක් අමතමිනි. 

උඩරට අමරපුර මහා නිකායේ මහා නායක පදවියෙන් පිදුම් ලැබූ කෝට්ටේ මාදිවෙල ශ්‍රී ඤානානන්ද බෞද්ධ මධ්‍යස්ථානය සහ හපුතලේ නිකපොත සුභද්‍රාරාම විහාරය ඇතුළු විහාරාධිපති, ශ්‍රී රතනජෝති වංසාලංකාර සද්ධර්මවාගීස්වර ශාස්ත්‍රවිශාරද පණ්ඩිත මහෝපාධ්‍යය නිකපොත චන්ද්‍රජෝති නාහිමියන් පිළිගැනීම වෙනුවෙන් මෙම උත්සවය සංවිධානය කර තිබුණි.

එහිදී වැඩිදුරටත් අදහස් දැක්වූ සජිත් ප්‍රේමදාස මහතා සෙසු ආගමික කොටස්වලට ලබා දෙන රැකවරණය මත රටක ඒකීයභාවය සහ දේශපාලන නිදහස තහවුරු වන බව ප්‍රකාශ කළේය. 

ඒ වෙනුවෙන් බුද්ධශාසන කැබිනට් අමාත්‍යාංශයට අමතරව අනෙකුත් ආගම් සඳහා ද රාජ්‍ය අමාත්‍යාංශ පිහිටුවා ආගමික සහජීවනය ඇති කිරීමට එදා කටයුතු කළ ආකාරය ද ඔහු සිහිපත් කළේය.

අතීතයේ මෙරට පැවැති සෘජු විදේශීය ආධිපත්‍යය වර්තමානය වන විට වක්‍ර ආකාරයෙන් රට වෙළා ගනිමින් පවතින බව විපක්ෂ නායකවරයා මෙහිදී පෙන්වා දුන්නේය. 

වර්තමානයේ රට මුහුණ දී සිටින ආර්ථික, දේශපාලනික සහ රාජ්‍ය තාන්ත්‍රික අවදානම් ජය ගැනීමට ලක්ෂ 220ක ජනතාවම එක මිටකට රොද බැඳිය යුතු බව ඔහු පවසයි.

රට තුළ පවතින ප්‍රායෝගික ආගමික පද්ධතිය ශක්තිමත් කිරීමේ අවශ්‍යතාව වෙනුවෙන් ඔහු මෙරට පවතින ආයතන සංඛ්‍යාවන් ද සිහිපත් කළේය,

* වෙහෙර විහාරස්ථාන: 14,129

* දහම් පාසල්: 10,347

* ශාසනාරක්ෂක බල මණ්ඩල: 3,127

* පිරිවෙන්: 824

ඉතිහාසයේ රජ දවසේ මෙන්ම මෑත භාගයේ ද අපේ මුතුන් මිත්තන් තමන්ගේ ඇස්, හිස්, මස්, ලේ දන් දෙමින් මේ රටේ ස්වෛරීත්වය සහ භූමික අඛණ්ඩතාව සුරැකි බව පැවසූ ප්‍රේමදාස මහතා, අද දවසේ ද මතුව ඇති අභියෝග හමුවේ පුරවැසියන් සියලුදෙනා අත්වැල් බැඳගත යුතු බව ප්‍රකාශ කළේය. 

බුද්ධ ශාසනයේ සැබෑ ආරක්ෂකයන් වන මහා සංඝරත්නය සුරකිමින්, උත්තරීතර චීවරයට ගරු කරමින්, නිවට ජාතියක් නොවී රට වෙනුවෙන් පෙරමුණ ගත යුතු බව පවසමින් විපක්ෂ නායකවරයා සිය අදහස් දැක්වීම අවසන් කළේය.