බස්නාහිර පළාත් ආණ්ඩුකාර හනීෆ් යූසුෆ් ධුරයෙන් ඉල්ලා අස්වීමට සැරසෙයි !

 

තමන් බස්නාහිර පළාත් ආණ්ඩුකාර ධුරයෙන් ඉල්ලා අස්වීමට අපේක්ෂා කරන බව ජනාධිපති අනුර කුමාර දිසානායක මහතා වෙත කලින්ම දැනුම් දී ඇති බව ආණ්ඩුකාර හනීෆ් යූසුෆ් මහතා පවසයි. 

තමන්ගේ ඉල්ලා අස්වීම සම්බන්ධයෙන් මාධ්‍ය මඟින් පළ වන විවිධ වාර්තාවලට සෘජුව ප්‍රතිචාර දක්වමින් ඔහු මේ බව තහවුරු කර තිබේ.

මෙම තීරණයට හේතු වූ කරුණු පැහැදිලි කරමින් ආණ්ඩුකාරවරයා සඳහන් කරන්නේ, තමන් වෙත පැවරී ඇති විවිධ භූමිකාවන් එකවර කළමනාකරණය කරගැනීමේදී මතු වූ දැඩි අපහසුතාව මීට හේතු වූ බවයි.

* බස්නාහිර පළාත් ආණ්ඩුකාරවරයා ලෙස ඇති රාජකාරි වගකීම්

* විදේශීය සෘජු ආයෝජන පිළිබඳ ජනාධිපති විශේෂ නියෝජිතයා ලෙස පැවරී ඇති කාර්යභාරය

* පෞද්ගලික පවුලේ වගකීම්

යන මේ සියල්ල එකිනෙකට සමබරව පවත්වාගෙන යාම තමන්ට විශාල අභියෝගයක් වී ඇති බැවින් මෙම පියවර ගත් බව ඔහු පෙන්වා දෙයි.

දේශයේ සංවර්ධනය උදෙසා මෙවැනි උසස් රාජ්‍ය තනතුරක සේවය කිරීමට ලැබීම සහ රට වෙනුවෙන් උපරිම දායකත්වයක් සැපයීමට අවස්ථාව ලැබීම තමන් ලද වරප්‍රසාදයක් ලෙස සලකන බව ද හනීෆ් යූසුෆ් මහතා ප්‍රකාශ කළේය. 

කෙසේ වෙතත්, මෙම තනතුර සඳහා සුදුසු වෙනත් අනුප්‍රාප්තිකයෙකු පත් කරන තෙක්, ජනාධිපතිවරයා කළ ඉල්ලීමකට අනුව තමන් තවදුරටත් බස්නාහිර පළාත් ආණ්ඩුකාර ධුරයේ රාජකාරි කටයුතු අඛණ්ඩව සිදුකරන බව ද ඔහු වැඩිදුරටත් අවධාරණය කර සිටියි.