යළිත් නිවසේ සිට සේවය (WFH)? ඩොලර් සහ ඉන්ධන අර්බුදය හමුවේ රජයෙන් තීරණාත්මක සැලැස්මක් !

ඩොලර් අගය ඉහළ යාම සහ ඉන්ධන ආනයන වියදම් ශීඝ්‍රයෙන් වැඩිවීම හේතුවෙන් පවතින ආර්ථික අවදානම කළමනාකරණය කරගැනීම සඳහා, රාජ්‍ය සහ පෞද්ගලික අංශ සේවකයන්ට නැවතත් “නිවසේ සිට සේවය” (Work From Home) ක්‍රමවේදයක් හඳුන්වා දීමට රජයේ අවධානය යොමුව තිබේ.

අද හෝ හෙට ප්‍රකාශයට පත් කිරීමට නියමිත මෙම නව සැලැස්ම හරහා විශේෂයෙන්ම ඩීසල් භාවිතය අඩු කර, රටේ ඉන්ධන සංචිත ඉතිරි කරගැනීම රජයේ මූලික අරමුණ වී ඇත.

පසුගිය දින කිහිපය තුළ රුපියලේ අගය දැඩි ලෙස පීඩනයට ලක් වූ අතර, ඇමරිකානු ඩොලරයක විකුණුම් අගය රු. 354.03 දක්වාත්, ගැනුම් අගය රු. 342.63 දක්වාත් ඉහළ ගියේය. 

මේ සම්බන්ධයෙන් අදහස් දක්වමින් මහ බැංකු අධිපති ආචාර්ය නන්දලාල් වීරසිංහ මහතා ප්‍රකාශ කළේ, රුපියල තවදුරටත් අවප්‍රමාණය වුවහොත් වෙළඳපොළ ස්ථාවර කිරීමට අවශ්‍ය මැදිහත්වීම් සිදු කරන බවයි.

මැදපෙරදිග පවතින යුදමය වාතාවරණය හේතුවෙන් ලෝක වෙළඳපොළේ තෙල් මිල ඉහළ යාම ශ්‍රී ලංකාවට තදින්ම බලපා ඇත. 

ලංකා ඛනිජ තෙල් නීතිගත සංස්ථාව (CPC) පෙන්වා දෙන්නේ මේ වසරේ මුල් මාස හතර තුළ පමණක් ඉන්ධන ආනයනයට ඩොලර් බිලියනයකට වඩා වැය වී ඇති බවයි. 

අප්‍රේල් මාසයේ පමණක් ඉන්ධන බිල ඩොලර් මිලියන 522ක් දක්වා ඉහළ ගොස් ඇති අතර, එය සාමාන්‍ය මාසික බිල මෙන් පස් ගුණයකටත් වඩා වැඩි අගයකි.

මීට අමතරව, වාහන ආනයන සීමා ලිහිල් කිරීමෙන් පසු ඒ සඳහා වැය වූ අතිවිශාල විදේශ විනිමය ප්‍රමාණයද මෙම තත්ත්වයට බලපා ඇති බව වාර්තා වේ. 

කෙසේ වෙතත්, දැනට රට තුළ ඉන්ධන හිඟයක් නොමැති බවත්, පවතින ප්‍රධානතම ගැටලුව ඉහළ ආනයන පිරිවැය පියවා ගැනීම බවත් බලධාරීන් අවධාරණය කරයි.